радиожелі арқылы байланыс

(Связь по радиосети)

бір радиостанция арқылы командирдің (штабтың) бірнеше бағынышты командирлермен (штабтармен) немесе бірге қимыл жасаушы бөлімдер және бөлімшелермен байланысын қамтамасыз ететін радиобайланысты ұйымдастырудың бір жолы. Радиожеліге қосылған барлық радиостанциялар радиобайланысты жалпы, ортақ радиомәліметтер (толқындар, шақырулар) бойынша жүргізеді. Радиожелі бойынша бір мезгілде радиожеліге кіретін 2 станция арасында немесе бір негізгі станцияның өзге барлық станциялармен байланысы (орталықтанған) жүзеге асырылады. Артықшылығы: радиобағытқа қарағанда радиостанциялар мен радиотолқындарды іздеуді көп қажет етпейді, жалпы өкімдер мен бұйрықтарды бір мезгілде бірнеше командир мен штабтарға жеткізеді. Кемшілігі: радиобағытпен салыстырғанда өткізгіштік қабілеті анағұрлым төмен.